Phile | MCQ | STEP |

Pairimani

Philemon

Vu'a Anejijihina

1 Poru Jesu Keriso oni tipurea 'ee núni vwea Timoti'i Pairimani núni vwea ka'ene nú oja mahe 'ee nú pu'úmo kaukara veji'ini jihuna'e veju. 2 'Ee Apia ka'ene núni ma'inijaho 'ee Achipasi sorutia ka'ene núni napurijaho 'ee oni sea vaji sosijihi puna'e veju. 3 'Enakúne areve Godi ka'ene núni Oma 'ee núni Natohwa Jesu Kerisora maiji vwihanúe 'ee matauvi'inijaho mihama.

Pairimoni Oja Ka'ene Mahajine 'Ee Huni Nimaaroijina

4 Na na'ia mapoka'e nuni Godiji teimani 'wavi'i oni iha 'urahe siporua 'ojura. 5 Ijihuni maijaho ara Godoni ehija'e maho'o oja mihe 'ee núni Natohwa Jesu nimaa ronuji henare avajura. 6 Nara siporua ka'ene 'ojujaho raka ka'ene ara nimaa ronuji ea 'aho'a 'wara'amajaho maa rukina'e rehuna. 'Ene Keriso onijihuna'e henaka mapoka mamaa ka'ene oni vaji navujaho roe maa rukina rehuna. 7 Vwea nune ara ea oja mihujara reju'e na niho'o teamanime oja sonahie 'ee Godoni ehija mapoka ijara ni'ajihu.

Onesimasi Ona'e 'Ona Vejajina

8 'Enajihuna'e na Keriso oni vaji nimaa veji'i 'waravukúne 'unama mamaa aririjiru ve'amana. 9 Emaa oja mihujihuni hurijihuna'e na a jarirame 'waravu. Na Poru ka'ene iviamaa Jesu Keriso oni tipurea rena hi'eme ema rejujara 'waravu. 10 Na nuni hariha Onesimasi ka'ene na tipurai hiji'i nahume Godoni ea renana'omo na hunijihuna'e jarirame a 'waravu. 11 Hu nimarakuijaho oni una'a areri pavenana. 'Enakaivo hu iviamaa oni una'a 'ee nuni una'a areri vehuna. 12 'Ena'omo na hu ranavu'e 'unama vu'u. Na oja mahuri eiji ranavu'e vu'ukúne teamana'eje ahe'amana. 13 Na vu'a maiu'ini jihuni hahi tipurai hiju. 'Ene na ura hu ranave nú hu'úmo hine oni tiniji apene na ni'ajihuna'e ura reniu. 14 'Enakaivo a patea mana'eje nara unenu pina ija'ina vehuna arira pa'ajihuna'e na pa'ejahaukúne a icha'ina'e mamaa vwihanu ja'ina'e ve'amana. 15 'Ene vi ijihuna'e hu a ma'uako ranama'i ani ru va'ana. 'Ejakame a kú'o hua'e ape'amajaho ranave ani pavahuna. 16 'Ena'omo hu iviamaakaho pwea kaivo pwea puni 'unami ja'ina pana vo nuni vwea ka'ene na oja mahujina. Ikaho nara hu oja mahujina vo iviamaa hu oni vu'ujaho haharu pana vo Natohwi jihuni vaji vu'ujihuna'e ijara marana asima paranana. 17 'Enajihuna'e a nuni napura re'amajaho areri nara vu'akame a naa'e ahe'ama ja'ina'e hu ahaamana. 18 'Ene hu oni unenu'u pina sise'i vene 'ee hu oni unenu'u pina apenana re'amajaho nuni chimua 'ahi muna'amana. 19 Na Porura ike asura kaho nuni iji vejujihuna'e nara ijihuni eha vehuna kaivo are'eje na ike 'waravuma nuni chimua onuna'i namu ijaho oni hiijina. 20 I'a nuni vwee! Natohwi jihuni vaji na ni'aji'amana. 'Eje Keriso oni vaji na oja sonahi'amana. 21 Na ara hene vehuniji nimaa roji'i pasia ikaho ona'e vejujihuna'e na nihejujaho nara 'waravukaho a venareje 'aho'a huri vehuna. 22 'Ene ija'ina'e veji'i nuni tinia amairi'amana. 'Ejakame Godira oni siporua eha veje na vu'e a kauta.

Túchamaa 'Ajoramajina

23 Iparasi nuni napura Jesu Keriso oni tipureijara hinujara 'ajoramu. 24 'Ene Maka ho Arisitakasi ho Timasi ho 'ee Ruku ka'ene nú pu'úmo kaukara veji'inijipo 'ajoravu. 25 Natohwa Jesu Keriso oni maiji vwihanii'inijaho oni 'aveniji'i hinama.